දෙවියනි ඔබ කොහිද ???

අපගේ මාතෘකාව ජනප්‍රිය පාඨයකි.
දුක් කරදර සිදු වෙද්දි බොහෝ අයගේ සිතට නැගෙන දෙයකි.

මුලින්ම දෙවියන් කවුද කියා අප දැනගත යුතුය.
දේවත්වයට පත්වන්නේ තමන්ගේ කර්ම ශක්තිය  අනුවය. එනම් මෙලොවදි හොඳින් පින්කම් කල අය මරණින් මතු දිව්‍ය ලෝකයේ උපදිති. එම කුසල් ශක්තිය අනුව බොහෝ කාලයක් දිව්‍ය සැප විඳිමින් කල්ගත කරති.

● අපගේ ගෞතම බුදුන්වහන්සේටත් පෙර සිටි බුදුවරුන්ගේ කාල වල ධර්මය අසා සෝවාන් වූ දෙවිවරු, දහම දන්නා දෙවිවරු තාමත් දිව්‍ය ලෝක වල සිටිති.
එනම් දෙවිවරුන්ට ධර්මය ගැන අවබෝධයක් ඇත. කර්මය ගැන අවබෝධයක් ඇත.
එසේම දහම රැකගන්නට මූලිකව කටයුතු කරන්නේද දෙවියන් විසිනි.
( බුදුන්වහන්සේගේ පිරිනිවණ සමග වසර 200කට පසු මිථ්‍යාදෘෂ්ටිකයන් විසින් දහම විනාශ කරද්දි අදාල සර්වඥ ධාතුන්වහන්සේලා රැකගැනිමට විශ්වකර්ම දිව්‍ය පුත්‍රයා විසින් කරන ලද විශ්මිත කටයුත්ත පැහැදිලිව ධර්ම පොත් වල ඇත)

● සරලව කිව්වොත් දෙවිවරු අපට වඩා උසස් මානසික ශක්තියක් ඇති පිරිසකි.
දෙවිවරුන්ගේ දිව්‍යශ්‍රීය, දිව්‍ය සැප සහ හැකියාවන් තම තමන්ගේ කර්ම ශක්තිය අනුව වෙනස් වේ.

● මූලිකව කිව යුතු දෙයක් වන්නේ මුළු ලෝකයටම අදාල සමස්ත දේව මණ්ඩලයම වෙනදාටත් වඩා ධාර්මික බවයි.
දෙවියන් අපගෙන් බලාපොරොත්තු වන දෙයක් ඇත්නම්, ඒ සිල්වත් ගුණවත් ජිවිතයක් ගත කිරිමය. පින්/කුසල් නිවරදිව කිරීම සහ ඒ කුසල් දෙවියන්ටත් අනුමෝදන් කිරිමය.
(දෙවියන් අපගේ පින් මත යැපෙන පිරිසක් නොවේ. නමුත් අපගේ පින් වලින් ඔවුන්ට යහපතක් කරන්නට අපට හැක)

* දෙවියන්ට පින් අනුමෝදන් කිරිමෙදි දෙවියන්ගේ නම සිතින් සිහිකර මෙම දෙවියන්ට මේ පින් අනුමෝදන් වේවා කියා කිව්වාම ඇතිය.

සමහර තැනක දෙවිවරුන්ගේ නම් භාවිත කරමින් විවිධාකාර මන්ත්‍ර යනාදිය ගැන කිව්වද ඒ කිසිවකට දෙවියන්ගේ ඍජු දායකත්වයක් නැත. සමහරවිට අදාල දෙවියන්ගේ පරිවාර සේනාවේ සිටින භූත, ප්‍රේත හෝ අවශේෂ අමනුෂ්‍යයෙක් එම කටයුත්තේ සිටින්නට හැක. එසේ වුවද ඔය බොරු විච්ඡූරණ වැඩ වලට දෙවිවරු සම්බන්ධ නැත. එය අප අත්දැකීමෙන් දන්නා දෙයකි.

● එසේම, අප විසින් දෙවි කෙනෙකු ගැන කියන අවස්ථාවල බොහෝමයක් අය ඒ දෙවියන්ට වදින ගාථාව ඉල්ලති. ඒ දෙවියන්ට පිහිට ලැබෙන්නට කටයුතු කරන්නට සිතති.
දෙවිවරුද තමන්ට ආශිර්වාද කරන්නට නම් එයටත් පිනක් තිබිය යුතුය. තමන්ට පෙර ආත්ම භවයක ඥාතිවයක් තිබෙන දෙවි කෙනෙක් නම් ආශිර්වාද කිරිමේ වැඩි ඉඩක් පවති. එසේම පෙර ආත්ම භව වල සිට වැඳුම් පිදුම් කලා නම් ඉඩක් පවති. - ඒ හැර හදිසියේ ගාථා කිව්වා කියා දෙවිවරු ආශිර්වාද කරන්නේ නැත.

ආශිර්වාද කරද්දි මූලිකව සිතන කරුණක් නම්, සිල්වත් ගුණවත්ද යන්නය..

● පසුගිය කාලයේ අප රටේ සමහර දේශපාලනඥයන්ව විවිධාකාර පුද්ගලයන් විසින් රවටා තිබුනේ ඔබට මේ දෙවියන් කැමතිය ඒනිසා මේ තරම බලයක් තිබේ කියාය.
එසේ ප්‍රේතයන්ගේ භූතයන්ගේන පේන බැලූ අය කියූ අනාවැකි බොරු බව පසුගිය කාලයේ අපට සාක්ෂාත් විය. තේරුම් ගත යුත්තේ යමෙක් දහමට පිටින් කටයුතු කරයිද එවන් අයට දෙවිවරු ආශිර්වාද නොකරන බවයි.

තවද මහා ලොකු පුද පඬුරු, පූජා වට්ටි වලින් දෙවියන් රැවටිය නොහැක.

● එසේම, පසුගිය කාලයේ සහ නිතිපතා සිදුවන අපරාධ, හදිසි අනතුරු ආදියට මූලික හේතුව එ් ඒ පුද්ගලයන්ගේ තිබෙන කර්ම ශක්තියයි. එසේම වැරදි තීරණ ගැනීමද හේතුවකි.
උදාහරණයකට සියලුම දෙනා කම්පා කල සේයා දියණියගේ ඝාතනයෙදි දෙමාපියන් දරුවන් ගැන තවත් සැලකිලිමත් වූවා නම් එම දරුවාට එසේ නොවන්නට යම් ඉඩක් තිබින.
දියණියගේ කේන්දර සටහන විග්‍රහ කරමින් අප දන්නා ජෝතිර්වේදි මහතුන් යම් විග්‍රහයන්ද කර ඇති බව අප දුටු අතර, එයින්ද දරුවාට යම් අකුසල කර්මයක් විපාක දී ඇති බවක් අපට සිතින. කෙසේ වුවද ඒ ගැන අප විසින් විග්‍රහ දීමට නොයන්නේ එය තව තවත් සිත දුකට පත් කරවන සිද්ධියක් නිසාවෙනි.
(සැබවින්ම එවන් දේවල් අසන්නට ලැබීමත් අප සියලුදෙනාගේම පවකි)

● විශේෂයෙන් කිව යුත්තේ, කොටසක් දෙවියන් අනවශ්‍ය ලෙස විශ්වාස කරමින් අන්ධ විශ්වාසයෙන් කටයුතු කරන අතර, කොටසක් දෙවියන්ට ගරහමින් දෙවිවරු බොරු යනාදි ලෙස කියමින් සිටිති.
අන්ධ විශ්වාසයෙන් සිටින අය සිතන්නේ ගරහන අයට දෙවියන් දඬුවම් කරාවි, කල යුතුය කියාය.
නමුත් දෙවිවරු කාගේවත් කර්ම ශක්තිය වෙනස් කරන්නට කටයුතු කරන්නේ නැත.

* බොහෝදෙනෙක් නොදන්නා කාරණය එයයි. දෙවියන් කරන්නේ අදාල කර්ම ශක්තියට අනුව යම් ආශිර්වාදයක් කිරිමය. නැත්නම් වැරදි කර කර්මය ඵල දෙන්නට නියමිත අය විසින් තවත් අකුසල් කරගනිමින් කරන්නට යන විනාශයන් වැලැක්වීමයි.
(පසුගිය කාලයේ සමහර දේශපාලනඥයන්ට වූ දේවල් සමග මේ ගැන දන්නා අය දන්නවාය)


● සෑම දෙනාටම ඉෂ්ට දෙවිවරු සිටින අතර, එම ඉෂ්ට දෙවිවරුන්ට දිනපතා මලක්, පහනක් පූජා කිරිමෙන්, විශේෂයෙන් කරන පින් “ මගේ ඉෂ්ට දෙවිවරුන්ට අනුමෝදන් වේවා “ , මේ පින් සියලු දෙවියන්ට අනුමෝදන් වේවා යනාදි ලෙස කටයුතු කිරිමෙන් දෙවියන්ගේ ආශිර්වාදය කාට වුවද ලැබෙනු ඇත.
ඔබ නිර්මාංශික නම්, එයද විශේෂ දෙයකි.

ඒනිසා අප විසින් සිතට ගත යුත්තේ, දෙවිවරු යනු තම කර්ම ශක්තිය මත උදව් කරන අය මිස, සර්ව බලධාරින් නොවන බවයි.
තමන් යහපත් නම්, සිල්වත් - ගුණවත් නම් දෙවිවරුන්ගේ ආශිර්වාදය ලබාගත හැක.

** දෙවියන් සිටිනවාද නැද්ද කියා විශ්වාස කල යුතුම නැත. තමන් ජිවිතය හරියට ගත කල යුතුය කියන තැන සිට ජිවත් උනාම ඇතිය.
ඔබ යහපත් නම් කවදා හෝ දිනක ඔබට යහපත උදාවනු ඇත. ඔබ අයහපත් නම් එසේම විපාක ලැබෙනු ඇත.

* අද කරදර විඳින බොහෝ අය පෙර ආත්ම භවයන්හි ඉහල සැප විඳිමින් නිසි ලෙස පින්කම් නොකල අය වන අතර අද සැප විඳිමින් පින්කම් නිසි ලෙස නොකරන අය පෙර ආත්ම භවයන්හි නිසිලෙස පින්කම් කල අය වෙති. ගැටළුව දෙකොට්ඨාශයටම භවයෙන් වැසී ඇති නිසා මේවා අමතක වීමය.

- විශේෂ ස්තුතිය - #සුකුමාල් හරිස්චන්ද්‍රට !