කේන්දරය බලවත්ද ? එහෙම වෙන්නම ඕනද ?

ඔබගේ කේන්දරය ප්‍රබල, බලවත් එකක් බව කවුරුන් හෝ ඔබට කියා තිබේද ?

බලවත් කේන්දරයක් යනු කුමක්දැයි ඔබ දන්නවාද ? ඇත්තටම කේන්දරයක් ප්‍රබල විය යුතුමද ?

● සමාජයේ ඇති පොදු මතයක් ලෙස, කේන්දරය ප්‍රබල නම් කරන රැකියාවෙන් ඉහලට යා යුතුය,
* රාජ්‍ය අංශයේ ඉහල රැකියාවක් ලැබී තවත් ඉහලට යා යුතුය.
* ව්‍යාපාර කරන්නේ නම් මහා පරිමාණයෙන් දියුණු විය යුතුය.
* දේශපාලනයට එන්නේ නම් ප්‍රාදේශීය සභාවක සභාපති වීම හෝ, අඩු තරමින් පළාත් සභා, පාර්ලිමේන්තුවත් යා යුතුය.

● සංකීර්ණ කරුණු සිතන්නට පෙර, අප මුලින්ම සිතා බලමු ජිවිතයක මූලික උවමනාව කුමක්ද කියල..

ජීවිතයක මූලිකව අවශ්‍ය වන්නේ යහපත්ව ජිවත්වීමයි, මරණයද යහපත්ව සිදුව මරණින් මතු ජිවිතය යහපත් වීමය.
එසේ නම්, ජීවිතය යහපත් වීමට රැකියාව ඉහල විය යුතුමද ? මහා පරිමාණ ව්‍යාපාර උවමනාද ? ඇමති කෙනෙක්වත් විය යුතුමද ?
- ඔබ සිතන්න... ඇත්තටම පිලිතුර කුමක්ද කියල...

● කේන්දරයක බලවත් බව තීරණය වන්නේ, භෞතිකව ලබන සියලු දියුණුව ගැන නොව, අවසානයේ සිතන කල ජිවිතය යහපත්ව ගත කරාද කියන තැනට පත්වීමයි.
 කේන්දරය කෙතරම් බලවත් වුවද මහජන මුදල් නාස්ති කල දේශපාලකයෙක් වීමේ තේරුමක් සැබෑවටම තිබේද ?
වසර 5-10-15ක වැනි කාලයක් ඇමතිකම් දැරූවද, කර ඇත්තේ වැරදි වැඩ නම්, එවන් අයෙකුගේ කේන්දරයක් බලවත් වීම ඇත්තටම හොඳ දෙයක්ද... ?

- අද කාලයේ ඉහලටම පැමිණි බොහෝමයකට බලවත් කේන්දර තිබෙන බව සැබෑය. නමුත් ඔවුන් එයින් කරගන්නේ පව්කම් සහ ගොන්කම්ය..
ඒ අනුව මේ ආත්ම භවයේ කෙතරම් බලවත් වුවද, කරන අකුසල් නිසා ඊලග ආත්ම භවයන් වල විපාක විඳිනු ඇත.  බලවත් කේන්දර තිබුනා කියා වැරදි කල අයට විපාක නොලැබී තිබෙන්නේ නැත, කවදාම හෝ ලැබෙන්නේමය.

● වතාවක් අප බැලූ කේන්දරයක් බොහෝ බලවත්ව තිබුනා මතකය, එම කේන්දරය හිමි කාන්තාව ඒ වනවිට වයස්ගත කාන්තාවකි. ආත්තම්මා කෙනෙකි.
ඇය රස්සාවක් කර නැත, සමාජ සේවා කටයුතු සංවිධාන වලට බැඳී වෙනම කර නැත.
- නමුත් ගමේ සියල්ලන්ගේම ආදර - ගෞරවය ලැබූ දරු මුණුබුරන් සමග සතුටින් සිටි කෙනෙකි.

එවිට  එන ප්‍රශ්නය ඇගේ කේන්දරය බලවත් වන්නේ කෙසේද  ?

● ඇයගේ ස්වාමියා දරුවන් කුඩා කාලයේ මිය යන අතර, තම දරුවන් වතුපිටි වල ආදායමෙන් පෝෂණය කර, ලොකු මහත් කර සමාජයට වැඩදායි අය කිරිමෙනි. ගමේම සියලු කටයුතු වලදි සහයෝගය දෙමින්, පින්කම් කල කෙනෙක් නිසාය. සියල්ලගෙන්ම ගෞරවයට පාත්‍ර වූ අතර, මරණයට පත්වී අවසාන කටයුතු වලට බොහෝ දෙනෙක් පැමිණ ගෞරවය දැක්වූ නිසාය..

- එනිසා වරදවා වටහා නොගන්න, කේන්දරය බලවත්ද නැද්ද යන්න නොව අවශ්‍ය වන්නේ ජිවිතය නිවරදිව ගත කිරිමයි. සංසාරයම සුවපත් කරගෙන යම් දිනක නිවන් අවබෝධ කරගන්නට කටයුතු කිරීමයි.


#ඉරු