අඟහරු 7

අඟහරු හෙවත් කුජ 7 සිටිම බොහෝම භයානක තත්වයක් ලෙස සමාජයේ ස්ථාපිත කර ඇති මතකයි.

නරක තත්වයක්, විවාහය කැඩෙන තත්වයක් ලෙස කුජ 7 සිටිම සමාජගත කර ඇත. එනිසා කුජ 7 කියන කාරණය කතා කරන්නවත් බය හෝ අසන්නට අකැමති දෙයක් ලෙස හුවා දැක් වේ.

කුජ ග්‍රහලොව සෙන්පතියාය. කුජ මුරණ්ඩුකමට, ලේ ධාතුවට මූලික වෙයි. කුජට මංගල කියාද නමක් වෙයි.

* කුජ 7 කෙනෙක් කසාද බඳින්න ඕන කුජ 7 කෙනෙක් සමඟමද ?

* 7 වැන්නේ අඟහරු සිටින අය පමණක් විමසන්න - මංගල තීරුව පත්‍තර වල අප දැක ඇත.

** සමහර කෙනෙක් ජ්‍යොතිෂ්‍ය විද්‍යාව මිථ්‍යාවක් ලෙස හඳුන්වයි...
ජ්‍යොතිෂ්‍යය විද්‍යාව පෙන්වාගෙන කරන සැබෑ මිථ්‍යාව මෙයයි, එනම් කුජ 7ට කුජ 7 අනිවාර්ය කිරීමද, මංගල දැන්වීමේ කුජ 7 ඇති අය පමණක් විමසන්න යන ඒවා සැබෑම මිථ්‍යාවට අයත් වෙයි.
( විවාහයට පොරොන්දම් ගැලපීම, කේන්දරයේ ග්‍රහ බල දුබලතා ගැලපීම විය යුතු අතර, දෙදෙනාගේ කැමැත්තද දෙදෙනාට අනිවාර්ය වෙයි)

●- කුජ දෝෂය/භෞම දෝෂය ලෙස කුජගෙන් ඇතිවන දෝෂයක් කේන්දර වල දැක්වෙයි.
එනම් කුජ ග්‍රහයා 1,2,4,7,8,12 වැනි තැනක පිහිටිමෙනි.
ඒ අනුව සිතුවොත් කේන්දරයේ ඇති කොටු 12න් 6කම කුජ පිහිටිමෙන් කුජ දෝෂය ඇති වෙයි.
ඒකියන්නේ කුජ දෝෂය 50%ක කේන්දර වල තිබිය හැකි බවයි.
- කුජ ස්වක්ෂෙත්‍ර වන මේෂ රාශිය හෝ උච්ච වන මකර රාශියෙදි මෙම දෝෂයන් අඩුවනු ඇත. විශේෂයෙන් කුජ දෝෂය බලපාන්නේ උභය රාශි වල උපන් අයටය. එනම්, කන්‍යා, ධනු, මීන, මිථුන රාශි වලටය. විශේෂයෙන්ම 1,4,7,8 සහ 12 වැන්නේ සිටීමෙන් මෙම දෝෂය  තත්වයන් බලපායි.


●  පොදුවේ, කුජ 7 සිටින අය ප්‍රියමනාප, ශක්තිමත් සිරුරක් හිමි අය වන අතර යහපත්  ලිංගික ශක්තියද හිමි අය වෙති. තමන්ට ලැබෙන භාර්යාව/පුරුෂයා මනා අඟපසඟ ඇති කෙනෙක් වෙයි.

● පොදුවේ කුජ 7 කෙනෙකුට,

* ගුරු 7 වැන්නේ සිටින කේන්දරයක් ගැලපෙයි (කුජ-ගුරු යෝගය)
පවුල් ජිවිතය තුල හොඳ පැවැත්මක් ඇතිවෙයි දෙදෙනාම පවුල් ජිවිතය මනා අාකාරයකින් පවත්වාගෙන යා හැක.

* සිකුරු 7 වැන්නේ සිටින කෙනෙකුද ගැලපෙයි (කුජ-සිකුරු යෝගය)
පවුල් ජිවිතය, අඹුසැමි ප්‍රේමය වර්ධනය වන අතර, හොඳ දුවාදරුවන් ලැබෙයි. බැඳීම ශක්තිමත් වෙයි.

● තවද කුජ ග්‍රහයා තමන්ගේ ලග්නයට පාපියෙක් නොවනවා නම් හොඳයි. 8 වැන්නාධිපතියා හෝ 12 වැන්නාධිපතියා කුජ නොවන්නේ නම්, උප්පත්ති කේන්දරයේ කුජට පාප දෘෂ්ටි වැටෙන්නේ නැත්නම් ඒ අයට කුජ බලපෑම නරක ආකාරයට බලපාන්නේ නැති තරම්ය.

-- මෙම සියලු කරුණු පර්යේෂණාත්මක ජ්‍යොතිෂ්‍යයට අදාලව පල කරන ලද පොදු කරුණු බව සලකන්න.
පෞද්ගලික කේන්දර සටහනකට පලාපල කීමට මේ තත්වයන් සූක්ෂමව බැලිය යුතුය. කුජ සිටින තැන, 7 වැන්නාධිපතියා, ග්‍රහ දෘෂ්ටි, අදාල නැකැත්, අංශක යනාදි බොහෝ කරුණු අනුව තීරණය වෙයි.

අඟහරු 7ට අඟහරු 7 යන කාරණයෙන් පමණක් විවාහයට ගැලපේ යන මිථ්‍යා මතයෙන් මිදෙන්න !!!

#ඉරු