ග්‍රහලොව සෞභාග්‍යයට අධිපති ගුරු හෙවත් බ්‍රහස්පතී එනම් සුරගුරු ග්‍රහයා, තමන්ගේ ස්වක්ෂෙත්‍ර රාශියක් වන (නිවස වැනි) ධනුවට පැමිණේ. වෘශ්චික රාශියේ සිට මෙසේ ධනුවට පැමිණීම සිදුවේ. ලංකාවේ ජනතාවටද මෙම මාරුවේ බලපෑම තිබේ. එනම් 11 වැන්නේ සහ 2 වැන්නේ අධිපතිත්වය දරණ ගුරුගේ මාරු වීම බලපෑමක් කරයි. පුරා වසරක් පුරා මෙම ග්‍රහ මාරුව පවතී. රටට වඩාත් යහපත් කාලයක් උදා වන්නට මෙම මාරු වීම සිදු වෙයි.
- ලග්න 12ට කෙසේද කියල බලමු !
( මෙය පොදු පලාපලයක් පමණක් බව සලකන්න )
-
● මේෂ
ගුරු ග්‍රහයා පැමිණෙන්නේ 9 වැන්නටය.
පින ගැන කියැවෙන 9 වැන්නට ගුරුගේ පැමිණීම සුභදායකය. විදේශ ගත වීම් වලට ඉතා හොදයි. තවද අධ්‍යාපන කටයුතු වඩාත් උසස් ආකාරයෙන් සාර්ථක කරගෙන යෑමටත් මේ කාලය හොදයි. රැකියා - ව්‍යාපාරද දියුණු වන කාලයකි. පෙර පින මතුවන කාලයක් බව කිව යුතුය. මේ කාලයේ නිසි ලෙස එම තත්වයන් කළමනාකරණය කරගත යුතුමය. එවිට වැඩි දියුණුවක් අපේක්ෂා කල හැක.
ගුරු, 22 දෙර්කාණාධිපතියා නොවේ නම් සහ පාප දෘෂ්ටි යනාදියෙන් දුර්වලව නැත්නම් මෙම සුභ ඵල තත්වයන් සැබවින්ම අත්විඳීමේ හැකියාවක් තිබේ.
-
● වෘෂභ
ගුරු ග්‍රහයා පැමිණෙන්නේ 8 වැන්නටය.
සැබවින්ම සුභ ග්‍රහයෙකු වන ගුරුගේ 8 වැන්නට පැමිණීම සාපේක්ෂ වශයෙන් යහපත්ය. 8 වැන්නේ වුවද බලවත් වීම නිසා හදිසි වාසනාව සහ දේපල ලාභ යනාදියටත් වාසනාව තිබේ. වෙනදාට වඩා සිතට සැනසීමක් ලැබෙන කාලයකි. මිතුරන් බහුල වන කාලයකි. අතමිට මුදල් සරු වෙන කාලයකි. දෙමාපියන්ගේ, ඥාතින්ගේ උරුමහරුමකම් ලැබීමටත් මේ කාලය හොදයි. ඔබගේ නිරෝගී භාවයද සුරැකෙන කාලයකි.
-
● මිථුන
ගුරු ග්‍රහයා පැමිණෙන්නේ 7 වැන්නටය.
මෙය සැබවින්ම විවාහ කාරක කාලයකි. එනම් විවාහ කටයුතු වලට වඩා හොදයි. කැපවීම තුලින් තමන්ගේ දියුණුව හොදින් කරගෙන යෑමට හැකියාව ඇත. ව්‍යාපාර යනාදියෙනුත් දියුණු විය හැක. එසේ වුවද හවුල් ව්‍යාපාර වලින් තරමක් පරිස්සම් විය යුතුය. එනම් රැවටීම් වලට ලක් වීමේ හැකියාව තිබේ. ජිවිතයේ ඉදිරි සැලසුම් කිරිමේ හැකියාව ලැබෙන කාලයකි.
-
● කටක
ගුරු ග්‍රහයා පැමිණෙන්නේ 6 වැන්නටය.
අන් අයගේ සැලකීම, අන් අයගේ කරුණාවට බඳුන් වීමේ වාසනාවක් මේ කාලයේ පවති. සතුරන්ගේ පවා හොද හිත ලැබෙන්නට හේතු පවති. තවද ඔබ මේ කාලයේ නිරෝගී වෙන්නට වාසනාව තියෙනවා. හදිසි ලාභ ලැබෙන්නටද වාසනාව තිබේ. අධ්‍යාපන කටයුතු වලටද හොදින් මහන්සි වී කටයුතු කිරිමට හැකියාව ඇති කාලයකි. තවද ආගම දහමට යම් නැඹුරුවක්ද මේ කාලයේ පවති.
-
● සිංහ
ගුරු ග්‍රහයා පැමිණෙන්නේ 5 වැන්නටය.
අධ්‍යාපනය ගැන කියැවෙන 5 වැන්නට ගුරු පැමිණීම තුල, අධ්‍යාපන කටයුතු හොදින් කරගෙන යාමේ හැකියාව ඇත. අධ්‍යාත්මික නැඹුරුවටද හොද කාලයකි. සෑමදෙනාගේම සිත දිනාගෙන කටයුතු කිරීමේත් හැකියාව සහ වාසනාව පවති. මංගල යෝගද සපිරි කාලයකි. දේපල ලාභ සහ මුදල් ලාභ යනාදියටත් වාසනාව තිබේ. හදිසි ලාභ, ලොතරැයි වාසනා යනාදියටත් වාසනාව තිබෙන කාලයකි මේ කාලය.
-
● කන්‍යා
ගුරු ග්‍රහයා පැමිණෙන්නේ 4 වැන්නටය.
පොදුවේ යහපත්ය. ගුරුගේ පැමිණීම නිසා කරන කටයුතු වලට තරමක පීඩන තත්වයන් ඇති වේ. කෙසේ වුවද අනිකුත් ගෝචරය සමග සසදා බලන කල දැඩි කැපවීම තුල එම තත්වය වඩාත් යහපත් කරගත හැකිවනු ඇති බව අපගේ විශ්වාසයයි. වාහන ලාභ තිබෙන කාලයකි. රැකියාවේ හෝ ආදායම් මාර්ගයේ දියුණුවක්ද අපේක්ෂා කල හැක.
-
● තුලා
ගුරු ග්‍රහයා පැමිණෙන්නේ 3 වැන්නටය.
කරන කටයුතු සාර්ථක වීමද අන් අයගේ ප්‍රශංසාවට බදුන් වීමටත් වාසනාව තිබෙන කාලයකි. වැඩිහිටියන්ගේ මෙන්ම තමන්ගේ ප්‍රධානියාගේ පවා ප්‍රශංසා ලැබෙන කාලයකි. මෙයද පින මතුවන කාලයක් බව කිව යුතුය. පවුලේ සමගිය වැඩි දියුණු වේ. අධ්‍යාපන කටයුතු, කලා කටයුතු වල දියුණුවක් අපේක්ෂා කල හැක. සමාජ සේවා කටයුතු වලින්ද දියුණුවක් ලැබෙන කාලයකි.
-
● වෘශ්චික
ගුරු ග්‍රහයා පැමිණෙන්නේ 2 වැන්නටය.
ධනය ලැබෙන කාලයකි. ආදායම් මාර්ග වලට හොදයි. වෙනදාට වඩා අතමිට සරු වන කාලයකි, තමන්ට හොද ඥාන ශක්තියක් මේ කාලයේ ලැබෙනවාය. තවද අධ්‍යාපන කටයුතු වලට හොද වාසනාවන්ත කාලයකි. නිසි කළමනාකරණයකින් යුතුව කිරිමෙන් වැඩි දියුණුවක් අපේක්ෂා කල හැක. උපදේශන සේවා සහ වචනය තුලින් වෘත්තින් කරන අයට වඩාත් හොද කාලයක් බව කිව හැක.
-
● ධනු
ගුරු ග්‍රහයා පැමිණෙන්නේ 1 වැන්න හෙවත් ලග්නයටය.
ලග්නාධිපතියා 1 වැන්නට පැමිණිම හොද කාලයකි. පෙරට වඩා වඩාත් හොද කාලයකි. ලග්න ඒරාෂ්ටක අපලය ගත වුවද වෙනදාට වඩා කරදර බාධක අඩුවන කාලයකි. අන් අය විශ්වාස කිරිමේදි බුද්ධිමත් වෙන්න. මෙතෙක් පැවති ආර්ථික දුර්වලතා ක්‍රමිකව සමනය වෙන යහපතක් උදා වන කාලයකි.
-
● මකර
ගුරු ග්‍රහයා පැමිණෙන්නේ 12 වැන්නටය.
මේ තුල හදිසි විදේශ ගත වීම් යනාදියට වාසනාව තිබේ. ඒරාෂ්ටක අපලය ගත වුවද ක්‍රමිකව වඩා යහපතක් අපේක්ෂා කල හැක. වියදම් කටයුතු වෙනදාට වඩා යහපත් වෙයි. නිරෝගී භාවය ඇති වෙයි. ඥානාන්විතව කටයුතු කිරිම තුලින් වඩා හොද තත්වයන් අපේක්ෂිතය.
-
● කුම්භ
ගුරු ග්‍රහයා පැමිණෙන්නේ 11 වැන්නටය.
ආදායම, රැකියාව වැඩි දියුණු වන කාලයකි. අතමිට මුදල් ගැවසෙන, පසුම්බිය සරු වන කාලයකි. ව්‍යාපාර යනාදියටත් හොද කාලයකි. යම් ධන ලාභ වලට ඉඩක් පවති. දේපල උරුමකම් වලටත් වාසනාව පවති. අධ්‍යාපන කටයුතු වලටද ඉතා හොද කාලයක් බව කිව යුතුය.
-
● මීන
ගුරු ග්‍රහයා පැමිණෙන්නේ 10 වැන්නටය.
ලග්නාධිපතියා රැකියාව - ආදායම් මාර්ගය ගැන කියැවෙන ස්ථානයට පැමිණීම ඉතා හොදයි. නව රැකියා අවස්ථා ලැබීමද, රැකියාව දියුණු වීමද අපේක්ෂිතය. තවද ව්‍යාපාර කටයුතු වලට හොදයි. දේපල ලාභ ලැබෙන්නටද වාසනාව තිබේ. බුද්ධිමත්ව සියල්ලම කළමනාකරණය කරන්නේ නම් වඩාත් හොදයි.
-
* ගුරු ග්‍රහයා අයත් වන්නේ, ලක්ෂ්මී දේව මෑණියන්, පත්තිනී මෑණියන් සහ විෂ්ණු දෙවියන්ටය. වෙනදාට වඩා අධ්‍යාත්මිකත්වය අගය කරමින් ජිවත් වන්නේ නම් ගුරුගෙන් වන අපල දෝෂ තත්වයන් අවම වන අතර, සුභ ඵල වැඩි දියුණු වෙයි !
#ඉරු
irusewaya@gmail.com
No comments:
Post a Comment